:恭喜你結婚~~ 我比你更開心!
你搵我做姊妹, 我當然會答應, 而且樂意配合你任何安排!
我同你一樣, 希望你既大日子漂亮又順利地完成!
作為你既重點工作人員之一, 我唔想你big day當日我企定定係度做花瓶!
我希望落手落腳歡送你出嫁, 希望可以幫到你...
咁, 好姊妹, 你願意我參與更多嗎?
以下幾個小tips, 係我做姊妹既親身體會, 俾你參考下, 幫我更容易配合你!!
你的Love Story -
我同你就好熟, 但對你老公認識不深, 可以講下你地點識嗎?
佢係個點既男仔? 由幾時開始, 你決定同佢長相廝守?
講多d俾我地聽, 我地當日就唔止做姊妹, 更會一齊參與你倆的婚禮!
你對Big Day的期望 -
你係佈置、禮節、流程上, 你同老公有咩要求? 對兄弟姊妹有咩期望?
我想知道你的期望, 等我更知道應該如何配合, 有咩臨時改動, 我都可以因應你既大原則去協助
當日程序 及 各人分工 (透明度! 透明度! 透明度!) -
我希望當日唔需要事事都問你, 因為你當日應該要做最開心最carefree既新娘!
希望你事先說明分工, 又make sure所有last minute改動都講晒俾我地聽
或者你擔心我地辛苦, 唔想我地記咁多野 - 但係如果我地唔知你既安排, 到時就會不知所措!
即使你冇安排伴娘/ 統籌, 我都想你assign我地其中一個做「呀頭」, 我地有咩問題可以問佢, 「睇佢頭」, rundown有咩改動你亦可以只同佢一個講, 由佢通知其他姊妹!
物資物流 -
呢個項目需要同兄弟合作
兄弟靚唔靚仔, 是否荀盤都唔係最重要, 最重要係 - 佢地會點分工? 我地有問題應該搵邊個?
我地自己帶來的物品 (如便服、遊戲道具等) 會放係邊? 由出門到婚宴場地, 又由邊個運送?
你地既重要物資由誰管理?
特別事項 -
你的賓客有否需要特別照顧的? 例如年長而行動不便的長輩, 是否有人照料?
會否有親友特別敏感, 或關係比較緊張, 敬茶拍照都需要20個小心?
當日要找的尾數由哪位keep? 是兄弟姊妹團, 抑或你的親戚? 到時service provider問我, 我都要識答嘛!
姊妹化妝 及 服飾 -
我地當然想當日排第二靚 (最靚一定係你)! 不過其實著咩又唔係最重要, 最緊要舒適
化妝: 靚! 靚! 靚! 早d都唔緊要! 不過你記得分好化妝次序話我地知! 我同班姊妹係好friend, 見多陣都冇所謂, 但要忙全日, 我地都想訓多陣!
長裙: 飄逸, 高貴, 隆重, 又唔洗煩對腳同對鞋, 但唔方便做野
短裙: 青春跳脫可愛又方便做野, 但大碼姊妹未必鐘意, 因為要show腿
Cutting: 如果我要上上落落, 搬搬抬抬既, 著吊帶/ 背心感覺就會安全點
鞋: 我想著對舒服的鞋... 講完
心理準備 -
你的大日子臨近, 我地同你一齊倒數! 我地都好興奮架~
你有咩心事可以同我地講, 我地會幫你分憂, 同你一齊諗掂佢!
我地最想開開心心咁參與你開開心心既婚禮!
愛你的好姊妹
paw
27.11.2013
