[轉] 不完美的身形，找完美的婚紗*~

網上見到一篇好好既揀WG貼士, 教B2B揀選合適的WG, 令不完美變成完美!
小妹將重點譯成中文俾大家參考~

原文: what body shape are you?

四種身形分別為: 長方形、蘋果形、啤型形、漏斗形

長方形 - 男仔/ 運動員身型，臀圍、肩膊圍相近，腰線不明顯

Tips: 選穿低腰、V領WG, 可令人覺得你有腰、性感又充滿女人味~

蘋果形 - 健碩、骨架大，臀部圓潤而欠缺腰線

Tips: 選穿上半身較花巧、能吸引注意力的WG, 可選低領, A-line同傘裙, 令你腰線更突出, 遮掩下圍
註: open neckline... 唔係好識譯, 係解可見到多點頸位的領口, 令人聚焦於你既靚靚樣, 有拉長上半身既作用

啤型形 - 臀圍比肩膊闊、腰線明顯

Tips: 選穿A-line、無肩帶、V領或低圓領WG，加上突出腰線，可顯得身型較標準，收埋大pat pat!

漏斗形 - 臀圍、肩膊圍相近但腰線明顯

Tips: 幸運的女孩! 可選穿任何款式的WG, 別穿A-line埋滿你美好的曲線吧! 最好穿魚尾款式!

附加資訊

http://www.preownedweddingdresses.com
http://www.weddingen.com/
- See more at: http://www.matchandfusion.com/2013/06/1893/#sthash.4LKDSamr.dpuf

http://www.preownedweddingdresses.com
http://www.weddingen.com/

完美的婚紗就是最適合自己穿的婚紗，多試上不同的款式，找出穿起來最漂亮的一款!

http://www.preownedweddingdresses.com
http://www.weddingen.com/
- See more at: http://www.matchandfusion.com/2013/06/1893/#sthash.4LKDSamr.dpuf

what body shape are you?

what body shape are you?

新人的甜蜜*~

今日同一對新人開會, 討論佢地5個月後既Big day run down

亦都了解下佢地既背景、愛情故事同埋對婚禮既期望

等我開始幫手準備佢地既大日子!

雖然新娘子同新郎哥keep住話佢地既愛情故事非常平凡...

但我就聽到一個專屬佢地二人, 好甜蜜既故事呀!

好開心可以同佢地一齊分享呢件人生大事呢

亦都好開心兩位對我有信心, 邀請我做佢地既Big Day MC

當然唔少得多謝花輪同學請飲果汁

BD MC... 「單拖」定「成雙」?

搵MC, 一位定兩位好?
撇開價錢, 當你計劃搵朋友幫手, 先分析下優缺點~

2人組合
一唱一和, 有火花, 較活潑
準備/ 夾稿需時較多, 雙方style可能有出入, 要加以磨合
兩個人講野時間一定會長d, 想簡簡單單既JM可能要諗諗
多個人多雙手, 臨場有咩需要人手調動都可以「變陣」
如果搵朋友擔此大任, 我認為2人較好, 一人計短二人計長以彌補經驗不足

1人話事
簡單之餘亦不失氣氛, 單拖MC同賓客更多互動
同新人夾時間開會, 寫稿等等都比較方便
由於係一人keep time, 而且係一人講野, 時間易掌握易控制
有突發事件或程序需要調動時, 一人較二人容易執生
如果係外面請專業BD MC (或者朋友本身好有經驗), 一人已經好足夠應付所有事

大家會點揀?

其實如果2人組合本身都係情侶, 感覺會幾溫馨 (不過千祈唔好over )... 如果想撮合一男一女, 都可以考慮搵佢地做MC... (哈哈... 我同熊仁先生成日都諗埋呢d野)

最後想講既係:
搵得MC就要對佢地有100個信心, 你作為主人家, 到時梗係盡情enjoy啦!

BD MC心得 之 大日子 (最後準備) 篇*~

跳一跳「制」, 唔講「度」稿住, 講下正式大日子既時候, BD MC有乜搞作先~
新人自己都o岩用ga!!
(註BD MC = Big Day MC, 不過呢度淨係落墨於婚宴部份~)

各位如果有更多資料, 記得留言同我婚享呀~


以下問題最好就早1-2星期問定新人先, 因為愈近大日子新人就愈忙, 早點問, 有咩未準備好都仲有時間補救~

BD之前就當然要同一對新人re-confirm當日幾點「蒲頭」啦~ 如果本身係兄弟姊妹團成員就好辦, 如果純粹到宴會才出現, 就要早d約好時間~ 到時早點到達現場準備~

Final confirm婚宴既run down~ (如各位有興趣, 小妹另有篇幅講Run down注意事項~)

到時既音樂係自備, 定係用場地提供既 (可能某部份如送客/ 背景音樂就用場地既, 但進場/ 簽紙/ 驚喜環節就用自己既)? 燒左CD, 定用自己player? 如果用CD, 記得要先試碟, 同埋準備多1-2隻copy以防萬一! 如果帶player, 記住帶埋電腦線! (另有篇幅專講音樂~)

幾個大環節如斟茶及影團體照, 會否早已安排專人負責? 斟茶係另聘大妗姐, 定搵自己親友? 專業大妗當然無需要你操心, 如果係自己親友就要準備定「貓紙」俾佢... 不過好可能都係你自己... 到時如有冷場都可以講下吉利說話~ 影團體照, 大概有幾多組? 有冇影相次序既清單? (俾你到時叫定下一group到台前準備, 唔洗新人企咁耐)

有否安排送客旅遊巴? 約左幾點? (方便到時預算時間完成所有項目) 行程係?

講住咁多先! 各位JM有興趣再繼續講其他心得~
有任何問題歡迎留言同小妹討論~

[資訊] 婚禮MC分享 - 敬茶時大妗姐的吉利說話*~

話說有一對新人係籌備過程時同小妹講已經搵左親友做大妗, 點知可能親友臨場怕羞, 唔講野既?!
好在小妹預先印左一份帶o係身, 發現冷場就即時「彈出」講下恭賀說話, 講到大家都拍晒手, 大讚好!
連場地職員都笑到卡卡聲, 問我係咪上過堂, 點解講極都仲有咁多...
完左斟茶環節之後, 我連張「貓紙」都送左俾職員姨姨, 佢幾開心

建議如果大家搵身邊親友做大妗、司儀或統籌, 都可以預先印一份, 等佢準備一下! (有d都幾難講出口, 要做定心理準備, 哈哈)

**paw心得:
以下粗體字係比較容易用到的吉利說話
一般黎講最常用都係「錢」「健康」「靚」呢類祝賀說話, 長輩最受落
如果想講生仔, 抱孫呢一類, 就最好事先同新人交帶一聲, 因為而家好多新人都未有打算生小朋友, 如果講得太多, 可能會令新人尷尬
預先了解有幾多親戚會飲茶, 預番大概要講幾多句, 盡量冇冷場、唔重覆已經好好

歡迎各JM分享心得!!
-------------------------------

中國傳統結婚敬茶儀式-大妗姐的吉利說話

斟茶及飲茶時
飲過新抱茶，富貴又榮華。
飲過新娘茶，靚過林青霞。
飲過新郎茶，型仔過劉德華。
飲過新人茶，發到笑ka ka。
飲過新人茶，發到笑哈哈。
飲過新人茶，開心到笑ka ka。
飲過新人茶，子孫聽晒話。
飲過新抱茶，出年做嫲嫲。
飲過新抱茶，生個孫仔四圍爬。
今年娶新抱，出年有孫抱。
一杯飲到尾，青春又健美。
飲過新抱茶，好快做嫲嫲。
飲茶笑呵呵，好快做婆婆。
飲茶笑騎騎，好快做爺爺。
飲茶飲到尾，年頭靚到落年尾。
茶到口，財到手，財神走到大門口。
茶到口，財到手，半山買多幾層樓。
茶到口，財到手，出年又飲滿月酒。
茶到口，越來越正斗。
飲深D，賺多D，中完孖寶中三Ｔ。
飲深D，等你買多幾個ＬＶ。
飲深Ｄ，生多Ｄ。
飲過新娘／新郎茶，靚過阿嬌阿ＳＡ。
斟茶比姨丈，買六合彩中頭獎。
一杯飲到尾，修身又健美。
茶到口，財到手。
茶到口，財到手，買田又買樓。
茶到口，財到手，買車又買樓。
茶到口，財到手，富貴榮華一齊有。
茶到口，甜到漏。
飲深D，賺多D。
飲深D，中三T。
香茶到口，添福又添壽。
甜茶飲到尾，青春又健美！
甜茶到口， 兒孫快有！
三杯到口，明年飲姜酒。
飲茶到口，橫財就手。
飲茶到口，得心又應手。

戴金或飾物時
戴起大囍，年年有喜，新郎哥養得起。
戴起大囍，戴到上手臂。　
戴起大囍，好快有新己。 　
戴過金手鍊，有錢又有面。
戴過金戒指，生個金童子。
戴過金頸鍊，個個都比面。
戴過鑽石戒指，出入渣波子。
金扼帶上，三年抱兩。
金扼夾到手，ＢＢ好快有。
戴起金器，大喜大喜。
戴起大囍，新娘好快有囍。
戴起大囍，戴到風生水起。
戴起大囍，戴到兒孫滿地。
戴起大囍，戴到金銀遍地。
戴起大囍，保你家肥屋潤笑嘻嘻。
戴金戴喜，風山水起。
戴過金介子，好快生對金童子。
金摙帶上頸，明年住山頂。
金扼夾到手，好快買車又買樓，美金都到手。
金介戴上，三年抱兩。
戴個大金牌，一世唔洗捱

資料來源: http://macau-wonderful-world.blogspot.hk/2011/09/blog-post_18.html

婚宴MC「度」稿心得 之 新人背景篇(一)*~

繼上一篇 婚宴MC「度」稿心得 之 基本篇*~ 之後
接下來幾篇blog都會同各位JM分享新人既「背景資料搜尋」小貼士~
小妹亦歡迎各位JM同我分享你既心得同小貼士~

新人背景篇 之一

未講重點前, 首先要搞清楚d concept先。

• 作為一個稱職既Big Day MC, 必定要事先做足功課, 同一對新人開會時要記者上身, 將一d佢地共同既秘密, 鮮為人知既心底話等, 挖出黎自己袋左落袋先, 仲要小心記低, 咁對你寫稿, 或者即場執生都好有用... 唔係到時求其企上台講晒個run down出黎就得ga!

• 不過, 拎左既資料唔一定要全部都用, 亦唔係濫用。寫稿或者在婚宴現場時, 司儀一定要有「抽絲剝繭」既精神, 多餘既資料不用, 太平凡的資料嘛... 一係將佢變得好有趣咁表達, 一係就放棄不用... 講得太多就會悶, 講得太少又突顯唔到一對新人既性格, 務必小心處理!

冇錯, 介紹新人背景既目的, 就係為左突顯新人既性格 加深賓客對新人既印象!!!

相識經過
相識經過絕對係必問既問題! 可能好多couples既相識經過都大同小異, 我諗最common既應該就係.. 朋友既朋友聚會相遇 --> 一班人玩 --> 單獨約會 (有冇JM都係咁樣同另一半相識? 揮揮手~)
作為BD MC, 你應該相信每一對couples都係獨一無二既。
所以你就要諗方法將呢個咁一般既相識經過變成非一般! 要搵出一d有趣既「side stories」令平凡經歷變得不平凡!

例如...... (以下內容純屬虛構, 如有雷同, 實屬巧合)
朋友聚會當日, 原來Michelle朝早起身唔係好舒服, 已經話左唔去, 點知最後因為屋企樓上有人裝修, 太嘈休息唔到, 嬲嬲地, 都係決定出黎join大家去行山~ 就係當時裝修呢一家人, 間接令到John同Michelle相遇相知, 今日仲攜手步入教堂!
咁某些觀眾就會記住左呢件事, 或者某日到佢聽到隔離屋裝修, 佢就會諗起呢對新人...

當然, side story有就有, 冇就冇 (主要係因為新人未必覺得自己既經歷特別), 唔可以強求, 但BD MC一定要時刻打醒12分精神! 一偵測到趣事, 就要「不恥下問」, 將全個過程鉅細無遺咁記低~

除左相識經過, 當然就係發展經過啦, 最初, 係女仔留意男仔先, 定調番轉?
由幾時開始, 女仔發現男仔原來一直留意緊佢? 佢有咩感覺?
男仔做過d咩令女仔say yes決定同佢開始?
如果新人好堅持呢part冇乜好講的話, 就當然唔好勉強~ 不過, 就算點cut, 最基本都要講下新人幾時相識, 或者拍左幾耐拖~


好, 之後再繼續分享~ 各位諗到有咩補充的話歡迎留言~

婚宴MC「度」稿心得 之 基本篇*~

 

徇眾要求, 小妹簡單分享一下各JM於「度」稿時需要注意既事項啦~
幫人做又好, 搵人幫自己做都好, 都歡迎一讀!

我會分開幾篇黎分享, 大家記住不定期黎探訪小妹個blog呀~

基本篇

1. 流程 - 新人是否已經計劃好當晚流程?
如果未, 請同新人一齊開會討論, 亦以局外人身份提出可以有助全晚流程順暢的小建議, 因為司儀必需熟悉全晚流程及時間分配, 而自己作為MC, 自己覺得表達得舒服就更易做好! 由於新人係第一次計劃流程, 由有經驗既司儀同佢地分享自己既見解, 對新人都有幫助ga!

2. Style - 晚宴會採用嚴肅 (有德高望重既長輩在場?) 定較輕鬆既形式? 對司儀既要求? 要「入屋」d casual d定係嚴肅d, 同現場賓客多d互動, 定冇乜所謂?

3. Theme - 如果婚宴有特別既顏色或backdrop, 會否要求司儀在服裝上有所配合?

4. 忌諱 - 新人有冇咩特別注意事項? 例如, 四大長老可能有些已經不在, 司儀必須小心, 因為「老爺奶奶、外父外母」咁叫真係好順口!

5. 驚喜 (一定要分別問新人, 唔好o係開會時一齊問呀!!) - 一對新人有冇驚喜環節送俾對方? 會o係咩環節插入? 記住驚喜環節一定唔可以加入overall既流程表, 否則就穿煲!! 開會時都唔好問, (答有又唔係, 冇又唔係) 一定要私底下分別問呀~

下一篇會同大家分享關於一對新人既「背景資料搜尋」小貼士~

歡迎各位JM一齊分享自己既心得~
另外, 邊位JM未搵BD MC/ 未做run down可以pm我, 小妹同你一齊準備你既BD run down!

刺激的 婚禮MC暨統籌 後感*~

昨晚終於體驗完小妹的「第一次」啦!!
第一次咁多即場改動, 好多extra野要突然照顧, 幸好一對新人係我地既朋友, 好多野佢地都放手交俾我處理!

其實... 小妹原本只係打算同熊仁先生一齊做好婚宴MC... 點知最後變成...
小妹一人上台做足全晚MC, 兼任埋大妗姐, 仲做埋統籌! 好叻叻!

首先因為原來係冇人負責按時間辦事既, 雖然我預先send左final run down俾一對新人, 但伴娘係並冇收到copy或指示係需要佢幫手跟進個喎 所以大家都問我應該幾時做d乜乜乜, 幾時做d物物物... 咁... 就由我話事啦!

而熊仁先生呢, 到last minute就「過左檔」做左播片同打碟既technician! 因為原來都係冇人負責既! 甚至連march-in歌, 敬酒歌, 新人都忘記左準備, 直到取場後5pm幾, 我同熊仁先生準備go through一次全晚流程時先發現!! 即時用會場wifi download歌, 同埋用熊仁先生部player d歌! 於是佢就要全程睇住部電腦, 確保運作順利... 以致唔可以一齊做MC啦... 呢一點我覺得有點可惜呢...

好在小妹有豐富既MC經驗, 最叻執生!! 雖然係第一次做婚宴既MC, 都有驚無險, 全晚流程得以順利完成!
最緊要當然係主人家開心, 親友都覺得賓至如歸!

最後小妹連book車送新人夫母番屋企呢d都「撈」埋!

小妹完場後訪問一對新人, 佢地都俾我滿分100分, 最緊要佢地滿意! 太好啦!
哈哈哈, 小妹既「第一次」真係十二萬個刺激!! 好玩! 之後再做MC同planner, 一定會做得更好!

做完呢次之後, 我覺得我可以出黎接job... 邊位JM未搵BD司儀, 可以pm我, 友情價!!