＊～閃閃發光的K歌新郎 @ 灣仔陶源酒家～＊

去年9月與WOW友Fiona & Sang開initial meeting
新娘子性格開朗又爽快, 同我一拍即合~
而新娘子 & 新郎哥相識多年, 默契十足!
好快就決定邀請我擔任佢地既Big Day MC!~~

12月底係佢地既大日子, 我同Fiona以及佢既兄弟姊妹係Big Day 2星期前開wrap up meeting~
當晚新郎哥要番工, 所以溝通驚喜環節既重任...
就由姊妹leader同我研究研究~~!!! 驚喜環節既design好快就定案了~

大日子當日, 場地的staff好認真協調, 我的要求好快有同事follow, 讚!

證婚的許律師一字一句清晰地宣佈禮成後, Fiona & Sang就正式成為夫婦~~

稍後... 當晚宴揭開序幕, 各人正享用美食之際...
我邀請Fiona到台前... 然後... 發現新郎哥唔見左???!!!

...搵極都搵唔到??

呢個時候, 全場燈光突然轉暗, Sang戴上串串閃閃發光的頸鍊 (係LED燈呀!), 手拿咪高峰...
屏幕一邊播出<<一生愛你一個>>的MTV, Sang一邊高歌, 一邊漫步走到台前...

「從前尋遍天邊海角... 不經意等到心中愛情主角...」
「請將一生的幸福也付託給我... 常在你心裡愛著我...」
「期望你跟我... 長路也走過...」

新娘子Fiona聽到Sang的歌聲... 驚喜咁傻笑...
新郎哥理所當然獲得全場歡呼 + 掌聲!!!

晚宴順利圓滿結束, 我當然要同一對新人合照留念啦!!

咦?? 點解相中會多左個小弟弟?
莫非...

原來...
F&S大婚當晚, 小妹除左氹得一班賓客、長輩、及最重要的一對新人開心之外...
更不自覺「吸納」左一班出席婚宴既小朋友Fans!!!

上圖既小弟弟, 係見我地合照, 情不自禁走上台拖住我架!!!!!!



仲有好多好精靈既小弟弟小妹妹... 由不相識到贈我香吻, 都只不過係幾個鐘...
你地大個仔大個女結婚, 會唔會搵paw姨姨做MC呢?

除左多左一班可愛小朋友"potential client"之外...
好開心伴娘、賓客以及一位場地職員都好欣賞paw既表現
表示希望向小妹了解多點Big Day MC既安排添~

多謝你地! 我會繼續進步, 唔會令你地失望架!!

亦在此祝願Fiona & Sang的婚姻繼續閃閃發亮!!

＊～感人至深小婚禮 @ TheONE利寶閣～＊

早兩日係另一對WOW友 Angel.b & 火星男 既大日子! 我當然繼續做Big Day MC~
今次番入室內, 係TheONE利寶閣進行律師證婚儀式暨晚宴~
梁生梁太既婚宴令我感動不斷!

當晚既證婚儀式由岑漢和律師主持, 岑律師俾我既第一個感覺居然係... 好慈祥??!
事實係岑律師有種由心而發既親和力, 好nice好溫柔, 當然亦都好專業!

(Photo by 火星男的朋友)

證婚流程順暢, 有一種平淡的感動~ 而一對新人既誓詞更聽到我眼濕濕
內容我就唔提, 留給梁生梁太2人慢慢回味
律師的一句禮成, 意味著二人正式開始人生既新一頁!

細心既Angel.b & 火星男由賓客角度出發, 唔想佢地捱餓, 因此我地將致辭留待開席後進行

...邊有咁簡單?! 原來中間仲穿插住surprise!!
今次的驚喜由新娘子帶俾新郎哥、奶奶及媽咪~

(Photo by Angel.b的朋友)

新郎哥的2份大禮簡直超sweet!!~~
而我手上的禮物就係由新娘子DIY送俾奶奶的! 好有心思~
我相信Angel.b同老爺奶奶一定會相處融洽!!

Angel.b & 火星男既婚宴得以順利完成, 當然唔少得一班得力既兄弟姊妹團、統籌、攝/錄工作人員以及新娘子既表弟幫手! 飲番杯慶功先!!! Cheers!!

(Photo by Angel.b的朋友 - 「打格仔」以保私隱 )

2位主角當日4點就起身準備, 非常厲害地到深夜仍未現疲態, 醒目又精靈! 勁!

我除左要多謝一對新人對小妹既信任之外, 更加唔少得一班熱情既貴賓, 當晚所有環節都非常俾到反應我! 亦睇得出佢一對新人同佢地既關係好好~ 親友們都好錫佢地~

亦想一讚TheONE利寶閣的職員, 佢地好幫得手, 非常配合我要求, 全程友善對待無黑面
眼見佢地照顧新娘亦都好細心~ 同時都睇得出除左經理之外, 其他侍應都好落力~

利寶閣樓底高, 感覺華麗, 場地「四正」, 大部份賓客都可以清楚睇到舞台! 舞台配合佈置亦十分優雅~

最後, 當然要祝Angel.b & 火星男既火星生活幸福不盡, 快樂無窮~
多謝火星男讚我「臨場處理反應好快好靈活, 令整個晚宴都好流暢」~~

ps. 婚禮攝影師Joe係我首次亮相, 主持席前切餅儀式後, 急不及待走黎問...
「呀paw, 你本身係咪做DJ既...??!!」
非常多謝你既抬舉! 我都好想係!!

＊～寒流不敵滿滿愛 @ 銀灘戶外午間婚禮～＊

上星期為WOW友 yuyufish & Mr Lo 既 戶外婚禮 @ ClubONE銀灘 擔任Big Day MC~

前一晚有點擔心「唔~天氣不似預期」會天寒地凍, 凍親新娘子...
幸而馬灣當日風和日麗、天朗氣清!
一定係太陽伯伯感受到Mr Lo既愛意, 眷顧佢地既婚禮


上次同Mr & Mrs Lo去視察場地時, 並無set up呢個戶外證婚區架!
搭好水上證婚台之後, 成個場即時grand晒~

一對新人選擇下午呢個陽光充沛既時間行禮, 雖然銀灘地點較遠, 但大家可以盡情享受美麗既景色~

Mr & Mrs Lo安排左西式自助餐招待各貴賓~
不得不提, 銀灘既新娘房非常寬敞! 而且光線一流~


入正題先! 小妹一定要同大家分享一下魚老公的十二萬個sweet!

有幾sweet? 有相為證!!

(Photo by 呀魚的朋友)

盧生盧太既婚禮籌備一直由呀魚主導, 同我聯絡, finalize rundown等等
6月及9月的prep meeting中, 又溫柔又有風度既魚老公都一直飾演聆聽者角色, 尊重呀魚一切安排

我當然一開始就表明有咩驚喜環節就私下搵我啦~ 但並無收到Mr Lo既消息...
直到婚禮前大半個月!

有一日, 魚老公靜靜雞聯絡我~
佢話因為呀魚最愛鬆弛熊同埋小丸子, 所以Mr Lo就希望係婚禮中加插2個特備節目 -
鬆弛熊做特別嘉賓、以及小丸子既越洋祝賀!

由於盧生盧太早前已經註冊, 所以出門當日既證婚純粹係形式上讓親友見證佢地互相宣讀誓詞
原定安排由我擔當證婚人~
不過, 既然有咁大個特別嘉賓, 小妹提議搞大d...

>>> 索性「邀請」鬆弛熊擔任佢地既證婚人!!

魚老公套左呀魚口風, 話唔介意證婚環節輕鬆一點後, 我地既大計就落實了
小妹仲做埋聲優, 事先扮聲, 錄低鬆弛熊既台詞, 然後係台上同佢「對答」...
完全係「自編自導自演」!!!
(呀魚事後話: 「真係估唔到會係咁」)

小妹仲非常榮幸接到新娘子既花球!! 花球好靚, 好真~


席間在場既小朋友們都好興奮, 個個都攬住鬆弛熊要同佢合照
一個甜蜜既安排, 無意間亦可收娛賓之效, 真係Perfect!

呢個婚禮的確滿滿愛~ 充滿一對新人既親戚、朋友、上司等等既祝福
佢地既兄弟姊妹團人數不多, 但每位都盡心盡力, 落手落腳幫忙
其中Mr Lo既妹妹以及其中一位兄弟更同我一齊演出「小丸子越洋祝賀」環節

另一個不得不提既地方, 令小妹非常欣賞呢對新人
當日佢地安排左剩食回收機構「環保熊貓」到場收集自助餐後剩餘既食物
佢地既主要服務對象係露宿者, 及其他弱勢社群

>>> 自己大日子都不忘關懷社會上有需要既人士, 讚!!

最後, 祝魚魚 & Mr Lo婚姻美滿, 甜甜蜜蜜~